ბრაზილიური "გაცოფებული ხარი”
ფრთხილად! გასროლისას შეიძლება ხელი მოგტეხოთ. ბრაზილიური მსხვილკალიბრიანი რევოლვერი Taurus-ის Raging Bull ანუ "გაცოფებული ხარი”.
ძნელი წარმოსადგენი არ იქნება, თუ რა საშიშია ხარის გაცოფება, მაგრამ, გინდ დაიჯერეთ და გინდ არა, ბრაზილიელების რევოლვერის ერთმა, მაქსიმუმ ორმა გასროლამ, ეს ხარი შეიძლება სამუდამოდ "დააწყნაროს”.
ვისაც Colt Anaconda ან Smith and Wesson G29-ის Clasic PX მოდელი ან სულაც Colt Python 357-ის ტიპის რევოლვერი უნახავს და, მით უმეტეს, უსვრია, ბრაზილიური "გაცოფებული ხარის” გასროლისას სულ სხვა, უდიდეს შეგრძნებას, ანდა დაზიანებულ ხელს მიიღებს.

რევოლვერის ინსტრუქციაში დაუფარავად წერია __ გასროლისას წარმოქმნილ უკუდარტყმას შეუძლია სახსრიდან ამოუგდოს ხელი მსროლელს, ხოლო დახურულ ტირში ჯობს, "გაცოფებული ხარი” არ გამოსცადოთ, თორემ თქვენს ყურებს კარგი დღე არ დაადგება, გინდ ყურსაცავები გეკეთოთ.
"გაცოფებული ხარის” ბარაბანში ხუთი ცალი მძლავრი __ .454 CASULL-ან .45 LONG COLT-ის ტიპის ვაზნა ექცევა. ამ ტყვიების მოხვედრას შეუძლია წააქციოს დიდი დათვი და კამეჩი, უკეთეს დღეში არც სპილოს ჩააგდებს.
ფაქტობრივად, ბრაზილიური "გაცოფებული ხარი” სანადირო რევოლვერის კლასს მიეკუთვნება და მდიდარნი ამა ქვეყნისა ამაზონიის ჯუნგლებში "გაცოფებული ხარის” გარეშე იშვიათად დადიან. ბრაზილიური რევოლვერი ვიზუალურად ძალიან გრძელი ლულით გამოირჩევა. თავად განსაჯეთ, რევოლვერის მთლიანი სიგრძე 36,2 სმ-ია, საიდანაც ლულაზე 21,4 სმ მოდის.

გარდა ძირითადი მოდელისა, მცირე პარტიით იწარმოება "გაცოფებული ხარის” მოკლე ვარიანტიც, რომლის ლულა 16 სმ-მდეა დამოკლებული.
"გაცოფებული ხარი” ვაზნების გარეშე 1,8 კგ-მდე იწონის, დამოკლებული მოდიფიკაცია კი 1,6 კგ-მდე.
რევოლვერს უყენდება ოპტიკური სამიზნე ნადირობის გასაადვილებლად, რის გამოც საერთო წონა შესამჩნევად იზრდება, თუმცა ეს უკეთესიცაა, რადგან ძლიერი ვაზნის გამოყენებისას ჯობს, იარაღი მეტს იწონიდეს, რათა უკუდარტყმის ძალა შემცირდეს.

სხვანაირად ბრაზილიურ "გაცოფებულ ხარს” "ჯიბის ჰაუბიცასაც” უწოდებენ და არც ცდებიან, რადგან გასროლისას ხმა მართლაც რომ დამრთგუნველია.