|
 ბრიტანელი მეომრები სნაიპერის აღმომჩენი
სისტემით აღიჭურვებიან.
 ბრიტანეთის
თავდაცვის სამინისტრომ ოპერატიული საჭიროების ფარგლებში გადასატანი
დეტექტორის Boomerang Warrior-X-ის საველე პირობებში სასწრაფო გამოცდის
ბრძანება გასცა. შედეგად, სამხედრო სფეროში პირველად, მეომრები კომპაქტურ
ინდივიდუალურ ხელსაწყოს მიიღებენ, რომელიც მათ ბრძოლის ველზე
მოწინააღმდეგის შენიღბული მსროლელის აღმოჩენის საშუალებას მისცემს.
ბრიტანელმა სამხედროებმა არჩევანი კორპორაცია Raytheon-ის წარმოებულ
სისტემა Boomerang Warrior-X-ზე შემთხვევით არ შეაჩერეს. ის ყველაზე მეტად
შეესაბამება მათ მოთხოვნებსა და ბრძოლის ველზე არსებულ ვითარებას. თანაც,
წინასწარმა ცდებმა აჩვენა, რომ ეს სისტემა მხოლოდ 100-დან 1 შემთხვევაში
ცდება, ზებგერითი საბრძოლო საშუალებებიდან კი 95%-ს ამოიცნობს.
გასაგებად რომ ვთქვათ, Boomerang-ი გამოსროლილ ტყვიას ზებგერითი ტალღით
აფიქსირებს და მოწინააღმდეგის საცეცხლე წერტილს მყისიერად ადგენს და
მიანიშნებს. ამრიგად, სისტემის ოპერატორისთვის სნაიპერის ადგილმდებარეობა
მანამდე ხდება ცნობილი, სანამ ეს უკანასკნელი პოზიციის შეცვლას მოასწრებს.
Boomerang Warrior-X-ი კომპაქტური სისტემაა,რომელიც მეომრის სტანდარტულ
ტაქტიკურ ჟილეტზე თავსდება. ის არცთუ მძიმეა – სულ რაღაც 311 გრამს იწონის.
ჩართულ მდგომარეობაში სისტემა მფრინავი ტყვიის აღმოჩენისთანავე ხმოვან
სიგნალს იძლევა და თან ასანთის კოლოფისოდენა დისპლეიზე მსროლელის
ადგილმდებარეობაზე ინფორმაციას წარმოადგენს.
ყველაფერთან ერთად, მეომრების სისტემებთან კავშირის წყალობით, ბრძოლის
ველზე არსებულ მდგომარეობაზე მუდმივად ინფორმირებულია ქვედანაყოფის
მეთაური, რომელიც შემდეგ მეტოქის პოზიციებისა და საცეცხლე წერტილების
კოორდინატებს მის ხელთ არსებულ რუკაზე იოლად ადგენს.
|